HUMMUS (garbanzos en paté)

Allá va la recetina de hummus, ye más tirada que facer la O con un canutu. Los árabes consúmenlo munchísimo, como equí la salsa de tomate, más o menos. Moyando pan de pita o pan ácimu o en cualisquier otru bocadillu o platu, o simplemente de guarnición en cualisquier platu.

Puede facese más llíquidu o más engrudu, depende de si ye como pa salsina o pa untar en pan, y del gustu de cadaquién.

HUMMUS

400 grs. de garbanzos cocíos
3 cucharadines de tahini (pasta de sésamo)
3 dientes d'ayu (o más o menos, en gustos)
zumu de un llimón (si ye mui grande, mediu)
1 yogur cremosu natural o mediu vasín de nata llíquida
sal
pimentón (duce o picante)
aceite d'oliva

El pesu de los garbanzos ye ya cocíos, en seco y enantes de remoyalos, va más o menos según chupen agua, 200 o 250 grs. El tahini ye una pasta de sésamo, supongo que podrá facese, pero yo cómprolo en frascucos en herboristeríes, haylo en casi toes. Ye que sin tahini, nun hai hummus que valga. Y usar yogur de cabra, ya, la cuenta, pero yo tamién suelo echá-y nata llíquida de vaca asturiana. A razón de dos cucharadines por mediu kilu d'hummus, el frascu dura meses metíu na nevera. Tamién lo uso pa los patés de berenxena. Tien un sabor fuerte y secu como pa comelu sólu, utilízase namás d'ingrediente pa otros preparaos.

Preparación

Cocer los garbanzos y trituralos. Yo quito tol caldo, pero ye posible tener una textura más lixerina dexándo-yos daque d'agua de la cocción o arrimándo-y un poquitín de lleche al final. Echá-y too lo demas, mezclar y triturar y ya ta.
Pa que quede más cremosino, yo métolo too nun tupper pa la nevera y a la mesmésima hora de comelo, extiéndolo y écho-y el pimentón y un chorrín d'aceite per enriba. Ye que ya soi una comedora d'hummus mui especializada.
Puede facese en grandes potrolades, porque aguanta la conxelación.

Venga la receta de les croquetines de patata con quesu, y la de bolines rebozaes d'ablana, non? Riquísimes, pal mio gustu. Como'l guacamole, los postres y les empanaes y eses hamburgers de verdurines... Vaya panda d'artistes-tragaldabes

Home, yo lo de echar yogur al hummus nun lo sabía. Yo echaba el tahini, aceite y lo que cuadrara dempués (llimón, yerbabuena, pistachos...) Pero lo del yogur nun lo tenía controláu

Agora mesmu cuelgo lo de les boles de patata.

Dalgún llácteu va bien, tanto pal sabor como pa la textura. Si eches parte del caldu de cocer los garbanzos, tará bien un yogur. Si se prefier textura más cremosa, nata llíquido. Si tenemos un engrudu de garbanzos ente les manes, venga lleche. La de cabra meyor tovía que la de oveya. El que llevé al 1er aniversariu de la cestina, llevaba mediu yogur d'oveya. Como tienen sabor intensu y textura como de cuayada, pinten bien pal hummus. Pero vamos, esto ya ye pa les gourmets del hummus, con un yogur natural o un chorru de lleche queda tamién fetén.

Paezme que fuiste tú, Xuan, quien me descubrió el tremendu mediometraxe West Bak Story, onde se dio a conocer el greatest hit "hummus hut". Píncholu equí pal esfrute común:
http://video.google.com/videoplay?docid=8860670051621711477#