GARBANZOS EN SOPICREMA

Póngovos la receta cola qu'estrené los garbanzos recién llegaos. Ya la tenía fecho dalguna vez, probela nes escandinaves la primer vez y quedéme cola copla por ser una receta mui rica, cenciella y ensin carnona.

Ingredientes
200 grs. de garbanzos
2 tomates curiosos
1 fueyina de lloréu
1 cebolla grandina
4 dientes d'ayu
1 cucharadina de pimentón duce o picante, o cayena o lo que seya que ponga la sopa contenta
sal y pimienta
200 grs. de verdurina fresca (espinaques, grelos, acelga, lo que haya)

Remoyar los garbanzos en agua 10 o 12 hores. Cocer los garganzos remoyaos en un llitru d'agua nueva, colos tomates cortaos en mitaes, el lloréu, la cebolla, los dientes d'ayu, el picantín, sal y pimienta negra al gustu. Cocinar tapao durante una hora y cuartu, más o menos, o hasta que tean los garbanzos tienros. Cuando tea fecho, sacar una cuarta parte de los garbanzos, más o menos. El resto, depués de quita-yos el pelleyu a los tomates, trituralo too. Yo suelo sacar un par de vasucos de caldu, pa facer otres coses y pa que quede más crema que sopa. Si se dexa tol caldu, o s'añade un poquiñín más d'agua, resulta más bien una sopina. Saltear la verdura troceada chiquitina, y echar garbanzos enteros reservaos y verdura pa la pota.