CALDU VERDE PORTUGUÉS: agora que lleguen les verdures rizaes, grelos y tol batállón d'inviernu

Esti ye ún de los platos nacionales portugueses, que los vecinos tamién tienen grelos y verdures rizaes.

350 gr. de col rizada, grelos, acelgues, la verdura qu'haya
1 cebolla
2 dientes d'ayu
4 cucharaes d'aceite d'oliva
500 grs. de pataques
unes ramines d'algues o unos cachos de gochín embutíu con pimentón (tamién llamáu chorizu)
sal, pimienta negra

Cortar la verdura en tirines finines y apartar. Ponse a sofreir la cebolla y el ayu hasta que tea transparente y entós, arrímense les pataques cortaes en rodaxes gordes. Añadir agua hasta cubrilo y dexalo cocer media hora más o menos, o hasta que les pataques tean mui tienres. Pasalo too pola batiora o pasapurés, ye más rico que nun quede mui triturada. Los portugueses fríen el chorizu pa desgrasalu enantes d'echalo a esta pota. Yo, pela mio parte, écho-y unos raminos d'alga collorada, que tien un sabor intensu y un colorín mui guapu. Salpimentar y añadir la verdura en tirines.
Como sopina gorda o caldu floxu, ye un platu tan humilde como ricu.

Susana, una entruga

Los grelos o lo que de verdura se tercie que se eche al caldu... ¿échase en crudu, o tamién se fai un sofritu primero, o un escaldáu, enantes?

Ah, sí, la verdurina hai que la escaldar un poquitín y echala después. Y dexalo cocer too xunto un minutu o dos pa que amesten tolos sabores. Yo tengo tamién la costume d'echá-y nuez moscada en cantidá bastante considerable. El pimentón tampoco nun-y va mal.