EMPANAES DE VERDURES

La empanada que comísteis na güerta d'Araceli y Antón ye receta tradicional que cuerre de boca en boca, pero hai que facer un poquitín de presión pa consiguila... Depués de facer unes cuantes, entames a pillá-y el tranquillu. Hai dellos truquinos pa que queden fetén, voi ver si atino a relatalos toos.

El rellenu: pa facer cualisquier empanada lo meyor ye guisalo'l día enantes de montala, asina pilla muncho más sabor. Les bases de los rellenos pueden facese con sofritos de cebolles, ayu, tomate y lo que más vos guste, y pa lo último, la carne o pescáu que vos preste más. Como ye una receta inventada p'aprovechar y allargar les sobres d'otres comides, puede aventáse-y dientro lo que seya. Téngoles visto hasta de pote. Pela mio parte, siempre les faigo a base de verdures, y munches vegaes écho-y soja texturizada a lo último pa da-y más cuerpu al rellenu. Tamién pueden, evidentemente, facese duces, con mazanes, cirueles, o cualisquier fruta, anque hai que mudar dalgunes cosuques de la masa, cambiar sal por azúcar, pimentón por vainilla, etc.

INGREDIENTES PAL RELLENU DE CEBOLLA
3 cebolles medianes
2 tomates maduros y pelaos
2 dientes d'ayu
1 cuartu de llitru d'aceite, más o menos
1 manoyu d'espinaca, acelga, o la verdura qu'haya
perexil
pimentón duce o picante
sal, dos cucharadines d'orégano, pimienta negra (o cualisquier otra especia que vos guste)
120 grs. del quesu que vos guste (yo eché-y gorgonzola)
2 o 3 cucharadines de parmesano rallao

Échase tantu aceite pal sofritu porque depués va colase y usase pa la masa. Ponse a calentar suavino l'aceite y échase la cebolla y l'ayu a refogar. Hai que dexalo guisar suave, y cuando tea un poco tiernino aventar dientro el sal, la pimienta, el perexil, el tomate picao mui pequeñín y la verdura picada. El guisu ta fechu cuando tea caldosu y la cebolla transparente. Apágase'l fuéu, cuélase, apártase l'aceite y échase'l quesu en trocinos pequeñinos, el parmesano y el pimentón, hasta que tea too bien derretío y amestao. Hai que lo dexar posar y enfriar enantes de metelo na masa.
Cualisquier cosa que s'eche na masa en crudo va soltar xugo al fornear y ablandala, asina que convién, seya lo que seya, cocinalo un poquitín enantes de metelo pa la masa. El rellenu tien de tar caldoso pero non muncho. Lo suyo ye escurrilo y guardar el caldu y aceite.

INGREDIENTES PA LA MASA
500 grs. de farina de fuerza
200 cc. d'agua tibio
12 (100 cc. más o menos) cucharaes soperes d'aceite del guisu de la empanada. Tamién puede echase crudu, pero pierde y resulta más ácida
1 trocín de llevaura fresca, del tamañu d'una ablana
1 cucharadina de sal
1 cucharadina de pimentón

(en munches panaderíes venden farina de fuerza y tamién cubinos de llevaura prensada. La llevaura tamién la tienen nel carrefour y nel mercadona, nes secciones de refrixeraos, onde les mantequilles o les mases ya elaboraes. Hai que guardala na nevera. Como ye un productu frescu y vivu, nun se puede guardar tantu como la llevaura seco, aguanta más o menos lo qu'un güevu)

- La masa
Poner la farina nun bol, facer un aguxeru nel centru, desmenuzar colos deos la llevaúra nel furacu y echá-y toos los ingredientes, excepto un par de cucharaes d'aceite. Los llíquidos tienen de tar tibios. Revolvelo con una cuchara de palo con cuidadín y cuando tea amestadino, echálo fuera p'amasar. Amasar hasta consiguir una masa elástica y non pegañosa. A mitá del amasáu, agréguense les dos cucharaes d'aceite reservaes, qu'ayuden a ligar la masa n'esi puntu. Formar una bola cola masa y dexala posar tapada con un pañu polo menos 1 hora enantes d'estirala. La llevaura meyor que seya siempre de la prensada. Cuanto más llevaura s'eche más gorda y esponxosa sal la masa, y anque la cosa va en gustos, nun s'usa pa fermentar, namás pa que cueza. Asina qu'una cantidá tan pequeña ye lo adecuao. Ye una masa fácil de trabayar, nun da guerra nenguna, nunos minutos ta llista.
Ye importante que la masa tea siempre más bien tibia a la hora d'amasar, asina que meyor que la superficie d'amasáu nun tea conxelada, porque d'esi modu enfríase la masa. Como truquín caseru, equí suelo trabayar la masa col fornu encendíu, porque se da'l casu de que col cacharru en marcha tola encimera se pon un poco calentina.

- La base
Cuando tea reposada, divídise la bola de masa en 2 pela mitá, una pa la base y otra pa la tapa. Sobre la mesa enfarinada estíralse col rodillu y cola forma del molde, hasta que tenga un grosor d'unos 2 mm. y fórrase con ella un molde de borde baxu o bandexa engrasaos. Los moldes de borde altu, tipu bandexa de fornear o de bizcochón, nun van mui bien. Repártese per enriba'l sofritu, escurríu pero col su puntu aceitosu y xugosu, procurando non enllenala n'excesu nin dexala medio vacía.

- La tapa
La parte de la tapa estírase igual y cúbrese con ella la base, apriétense y tréncense los bordes, pasando el d'embaxo per enriba de la tapa. De salise'l rellenu mientres se fornea, la cosa pinta mal, ye importante cerrala bien, apretar los bordes hasta que tean pegaos. La decoración fáese colos retales que vayan sobrando mientres se forra'l molde o si ye mui abundante, puede guardase una tercera boluca nel momentu de dividir la masa. Pa lo último déxase la "chimenea", un aguxerín del tamañu d'una moneda de diez céntimos. Pa que tenga colorín, puede pintase con güevu batíu per enriba, una capa o dos, dexando que seque un poquitín ente la primera y la segunda. Con una tixera, van faciéndose cortes per tola tapa.
Asina cerrada puede perfectamente quedar na nevera y cocela hasta dos o tres díes depués, nun pierde si ta refrixerada.

- Fornear
Lo meyor ye cocela a bona temperatura, así sal xugosa per dientro y cruxiente y dorada por fora. Caliéntase'l fornu a 200º o 220º y a una altura media hasta que tea nel puntu, más o menos tres cuartos d'hora. Los 15 primeros minutos hai que vixilala, porque si infla toca pinchala pa que baxe. Nun hai problema en abrir el fornu mientras cuece. Si nel momentu de sacala se pinta un poquitín d'aceite va quedá-y más colorín per enriba.

Paez un trabayu de la virxe, pero depués d'unes cuantes, nun ye pa tanto. Como puede dir ellaborándose en dellos pasos, nun ye tan abegoso como paez.

Deliciosa....salió de muerte, y eso que mezclé fariña de fuerza con normal porque nun tenía bastante
Susana...a poner mas recetes!!!!