COCA DE CALABAZA

Pongo la receta d'esti bizcochón del que se puede alimentar una familia de cuatro unos cuantos díes. Ye un bon destín pa la calabaza, que tantos ratos bonos da en Casa Malone en salao o en duce. Ye mui cenciello de facer, nun tien pérdida y ye raro que salga mal.

1/2 kilo de calabaza asao
300 grs. de azúcar
200 ml. d'aceite d'oliva suavín
500 grs. de farina de trigu
5 huevos
1 sobre de llevaúra
1 sobre de gasificante d'estos que venden nel Mercadona o meyor, una cucharadina de bicarbonatu
Canela en polvu

La calabaza puede preparase cuando seya, yo suelo facelo el día enantes, namás ye metela al fornu una hora envuelta en papel d'aluminiu a 180 º. Si nun ablanda nuna hora, nun pasa nada porque quede más tiempu, el casu ye que tea bien blandina. L'últimu recursu ye meté-y la batidora pa que nun quede munchu tropezón. Quítase-y el papel y cuando enfríe un poquitín, quítase-y la corteza y les pepites y guárdase namás la carne asada. Yo suelo sacar la carne con una simple cuchara y metelo nun tupper. El pesu de mediu kilu de calabaza ye la carne de calabaza ensin corteza nin nada, pero si se calcula mal y resulta un pelín menos, nun pierde méritu la coca. Resulta una testura muncho más fina que nos bizcochos que lleven zanahoria.

Precalentar el fornu a 180, con calor enriba y embaxo. Poner la calabaza asao xunto colos güevos y l'azúcar y batilo too bien. Depués, añádese l'aceite y améstase too bien. Pésase la farina y mézclase cola llevaúra y el gasificante o bicarbonatu y viértese too na masa. Ye una cantidá respetable, hay que usar un cacharru grande. Hai que lo amestar too bien, pero ensin batilo muncho tiempu, namás integralo. Si se dexen esperar muncho les mases, les llevaúres entamen a actuar en crudu y eso ye malo pa los bizcochos a la llarga.

Engrasar con mantequina o aceite un molde grande, meyor cuadráu o rectangular, namás porque queda más guapo y porque d'esa manera sube igual por tolos llaos. Yo uso ún rectangular de 25 x 25, queda un espesor de coca d'unos diez centímetros, medra bastante. Echar la masa nel molde y menealu bien pa los llaos, ye una masa espesa y pa repartila bien pel molde ye meyor nun-y meter espátules nin cubiertos, que depués queden les marques. A lo último, amestar dos o tres cucharaes d'azúcar con una cucharadina pequeña de canela molío nuna tazina y espolvorealo too per enriba de la masa cruda.
Metela nel fornu y en 40 minutos más o menos, fecho. Ye conveniente vixilala a partir del minutu 35 o asina, y tamién comprebar que ta bien cocida pinchándola. Si usáis un molde más pequeñu y ye más gorda, necesitará un pelín más de tiempu, claro.

Desmoldala y dexala enfriar fora del molde.

Pa nota ye la cremina de calabaza, aunque ye un bizcochu xugosu siempre-y queda bien un poquitín de crema. Faese con un bote de nata pa montar, cuatro cucharaes de calabaza asao (hai que guardalo) y dos cucharaes soperes d'azúcar glas. La cosa ye amestar la calabaza cola nata y montalo, y al final del too, cuando suba, amestalo col azúcar.

Ye un bocáu riquísimu,y pa da-y matarile una persona sóla, hai que comer a mui mui bon ritmu y en gran cantidá. Ye recomendable regalar dalgún trocín. Y yo siempre toi dimpuesta a ayudar a comer una d'éses si dalguién se ve mal pa terminala...