BOLINES DE PATATA Y QUESU AZUL

Nun sé si teníeis prebáu enantes lo del puré de patata con quesu azul, pero ye una combinación que queda bien prestosa, especialmente acompañando carnes u otros guisos.

Ocurrióseme facer esi amiestu fechu boluca, con un toque un poco distintu. La base nun ye más que pata cocía con quesu azul y un rispiu llechi, fasta que tea la testura que vos preste. Nun fai falta echar sal, el quesu ya-y da sabor bastante.

En llugar de rebozales con fariña, ocurrióseme que la "cobertura" ya tuviera sabor de por sí. Prebé con fariña de garbanzos, soja molida (lo que sobra dempués de facer la llechi) y ablanes picadines. La versión de fariña de garbanzos nun me prestó, pero les otres dos sí.

Dempués, pa que'l bocáu nun quedara mui pesáu (fritura + patata) ocurrióseme echar daqué que fora un sabor totalmente distintu y que resultara lixeru. Lo del vinagre paecióme bona idega. Como el vinagre a seques nun tien testura y nun diba aguantar, atopé nel supermercáu un botín de crema de vinagre de jerez (nos supermercaos los hai de jerez o de módena). Eso sí, el toque del vinagre queda meyor si ye "echar nel platu y comelu". Si non, el sabor queda un tantu difumináu.

Como veis, más que una receta ye un "vamos ver cómo queda", versión bocáu. A estu se-y puen facer múltiples versiones, claro, según los gustos de cada ún.