FABES DE MAYU CON SALSA ROMESCO

La receta de salsa romesco ye típica pa comer pescaos o calçots (una especie de bulbu de cebolla típica de zones de Tarragona y orientales d'Aragón). N'esta choza suel comese con cualisquier otra verdura, n'esti casu preparóse con fabes de mayo. El casu yera comer les fabes d'ingrediente principal, porque ye'l típicu alimentu humilde que siempre va de guarnición. Asina pueden saborease mui bien.
Paez abegosu de facer pero ye namás apariencia, nun da guerra nenguna, namás procesar les coses. Con estes cantidaes sal más o menos mediu llitru de salsa.

INGREDIENTES
- Mediu kilu de fabes de mayu
- Unes fueyes de menta
- 3 tomates maduros
- 1 cabeza d'ayu
- 2 ñoras o pimientos secos o 2 cucharaes de carne de pimientu choriceru
- 15 gr. d'almendres tostaes y 15 gr. d'avellanes tostaes (too esto, pelao)
- 1 rebanada de pan tostáu
- 200 grs. d'aceite d'oliva
- 100 grs. de vinagre de vino
- Pimentón (dulce o picante, al gustu)
- 1 guindilla o un pelín de cayena
- Sal

Cocer media hora les fabes de mayu con unes fueyines de menta. D'usales seques, el día enantes hai qu'alcordase de dexar les ñores en remoyu. Nel momentu de facer la salsa, sáquense y apártense les pepites. Poner al fornu los tomates y la cabeza d'ayu, a 200º un cuartu d'hora o veinte minutos, meyor en fuentes separaes, porque los ayos tarden un poco menos. Sacalo too, quita-y les pieles al tomate y separar los dientes d'ayu. Dexar enfriar mientres se piquen los frutos secos y se tuesta una rebanadina de pan. Una vez tea too templao, poner toos los ingredientes nun recipiente pa pasalo pola batidora, dexando pimentón y sal pal final. Pegá-y otra vuelta de batiora y correxilo de sal, de vinagre o de picante, al gustu de cada cual. Lo suyo ye comelo caliente, el microondes ta bien pa recalentar. Si presta más espesa, namás hai que poné-y más pan ralláu o más frutu secu.