COSES D'ACELGUES

Ingredientes pa 4 presones (o 3 con muncha fame):

- 1 kg Acelgues
- 1 Llimón
- Nuez moscada
- 30 gramos de fariña
- 50 gramos mantequilla
- 250 cl llechi
- sal

1- Llavar les acelgues, mandar los bichos y los caracoles que traigan pa la güerta, y cortar en xuliana (les acelgues, colos caracoles nun fai falta ser tán sádicos)
2- Coces les acelgues n'abundante agua ferviendo con un rispiu sal, destapaes, unos 5 minutos. La golor que va quedar na cocina va dar ambiente de cocina de pueblu. Dempués, escurrir y dexar aparte.
3- Garrar un cazu y derretir a fueu llentu la mantequilla, apurriéndo dempués la fariña. Según tea ya fechu l'amiestu, y ensín dexar que se tueste la cosa, echar el llimón, un rispiu sal, y amestalu bien.
4- Dir echando la llechi poco a poco, faciendo una crema ensín grupos y un pelín suelta. Echá-y dempués nuez moscada. Los pasos 3 y 4 puen resumise en "facer una bechamel que quede más bien suelta, pero enantes de la llechi, echá-y un rispiu llimón"
5- Nuna bandexa pal hornu, echa-y les acelgues, y bañales cola bechamel. Too ellu pal fornu, gratinando cosa de 10 minutos.

Ye una receta más bien facilona, nun tien complicación denguna. Ye una variante de les espinaques, berces, coliflor o lo que cuadre verde con bechamel. Pero el toque del llimón da un gustu bastante peculiar. Según lo taba comiendo, ocurrióseme que, col sabor que da el llimón, si echara un poco azúcar en llugar de sal, echara ún o dos güevos pa que cuayara, y montara tol tingláu en tartalestes y non en bandexa de fornu, bien podría camudase un platu saláu en daqué dulce.

Faeré dalgún intentu, a ver qué sale. Ya vos contaré.