Taboulé con (o ensin) algues

El Taboulé ye una receta típica d'oriente mediu. Nun ye más qu'ensalada de cuscús. Puede echáse-y lo que más preste, yo tube prebando a arrimá-y tamién dalgunes algues. Ye una cosa mui fácil y bien rápida, pero fastidié bien d'ellos hasta que di cola manera bona de facelu, col puntu xustu d'agrio y duce y col cuscús más o menos sueltu.



250 gramos de cuscús (medianu o grande)
3 llimones
2 cucharaes soperes de perexil
un vasu d'aceite
mediu vasu de vinagre de mazana, o cualisquier vinagre tirando a duce
sal
pimienta
media cebolla
2 tomates
1 pimientu roxu o verde
6 o 8 pepinillos en vinagre
unes fueyes de menta picaes

Ponse un cuartu llibru d'agua nun cacharru y cuando tea ferviendo, retírase del fuéu y échase-y el cuscús como si lloviera, cuscús escanciáu. Enantes de que temple, cuando haya chupao l'agua, a los cinco minutos, añadir el zumu de tres llimones (al gustu de cadaquién) y dir ayudándose con un tenedor pa separtar los granos y que nun queden apelmazaos. Puede usase una cucharada de manteca, que-y dexa un saborín mui ricu, o dir echándo-y cucharadines d'aceite. Depués, terminar d'añadir l'aceite, la vinagre, la sal, el perexil y la pimienta. Lo ideal ye tenelo macerando como poco un par d'hores, o dexalo na nevera pal día siguiente, pero tamién se puede comer en cuantes enfríe. Pa completar la ensalada, añadir les verdures que más presten, pimientu, cebolla, tomate, pepino (o pepinillos en vinagre) y l'alga duce, too bien picadino. L'alga duce requiér namás metela en remoxo un minutu, picala, y pa dientro. Tómase bien fresca y pínte-y mui bien unes fueyines de menta picao.

Ye una ensalda mui rica pal mio gustu, y como toles ensalaes, versátil, puede echáse-y lo que haya. Los llimones, pues van en gustos, pa que nun canten muncho, con tres ye suficiente, pero pueden echase cinco o seis tranquilamente, dependiendo del paladar de cadaquién. Los pepinos en vinagre dan un gustu avinagráu mui prestosu, pero too ye echá-y un pelín más de vinagre y pepinos al natural. Inclusive la remolacha macerada tien de quedar mui rica.