BUDIN DE PLÁTANU Y NUECES

Lleva
6 madalenes (cada cual, que tire de la so receta, tamién sirve l'equivalente en bizcochu de mantequilla)
3 plátanos
3 huevos
250 ml de lleche
250 ml. de nata
80 grs. d'azúcar
rallaúra d'un llimón
2 puñaos de nueces
canela
carambelu de naranxa (200 ml de zumu de naranxa, 100 grs. d'azúcar y a reducilo nun cazu veinte minutinos. Al enfriar, engorda)
salsa de chocolate

Les madalenes o el bizcochu pueden facese en cantidá y cuando queden namás unes poques, ye'l momentu de ponese col budin.

El carambelu de naranxa ye meyor preparalu lo primero pa qu'enfríe y tea gordín.

Batir l'azucar colos güevos y en cuantes blanquee, añadir la nata, el lleche, el llimón y amestalo too bien. Desmigar les madalenes o el bizcochu na mezcla y dexalo empapar bien. A lo último, aventá-y les nueces y los plátanos cortaos en laminines o en dadinos, al gustu de la cocinera.

Remoyar el molde col carambelu de naranxa y rellenalu cola mezcla. Poner el molde n'otru más grande con agua y tenelu nel fornu al bañu maría 40 minutos o hasta que cuaye. A mín quedóme bastante derrengáu, lo suyo ye meyorar la receta pa que quede durín. Igual tenelu na nevera un tiempín lu ayuda. Ye fácil de desmoldar, lo d'abaxo queda p'arriba y per enriba puede echáse-y canela, azúcar glas, cacao, unes almendrines picadines y cruxientes tamién quedaríen bien...

La salsa de chocolate yo faigola con mitá de ml. d'agua que gr. de chocolate, un poquitín de nata y un pelín d'azúcar. Lo más cómodo ye amestalo too y calentalo un poquiñín y depués echá-y el chocolate en trociquinos al final, dándo-y tol tiempu cola varilla. La cantidá de nata y d'azúcar va en función de los gustos y del porcentaxe de cacao del chocolate que se use. Una ye más bien de tacañear l'azucar y el llácteu, porque ya el budín ye una cosa bastante duce.