FRIXUELOS RELLENOS

Buenes, moces y mozos

Esti ye un platu que tien la su complicación más pol tiempu y les fases que lleva, que en sí pola complicación. Pero pue dir faciéndose a ratos, porque bona parte de lo que se fai de comida pue facese d'un dii pa otru.

El platu en cuestión lleva tres partes:

- El rellenu. Esto pue facese de lo que más vos preste. Pa orientavos, yo tengo fecha la preba con dos rellenos distintos: ún con un guisu de repollu especiáu y con una salsina de llechi y cúrcuma, y otru con un rellenu típicu de carne picada, como el de lasaña, canelones, etc El rellenu pue facese perfeutamente d'un dii pa otru. Dafechu, asina ganen sabor

- Los frixuelos. Pues nun ye más que la receta típica de frixuelos. Eso sí, hai de facelos un poco más gordos, cola masa un poco más espesa. Nel mi casu, los fice con fariña de castaña, que tenía por casa. Pero tampoco fai falta ponese tan quisquillosu.

- Un puquiñín de bechamel. Tien de tar un puntín llíquida, porque úsase como una crema, pa echar sobre los frixuelos rellenos. Como teo asgaya por casa, pues me dio por echar a la bechamel unos trozinos de berenxena. Da-y un saborín distintu, y sobretoo un colorín peculiar.

Dependiendo principalmente cómo quede el rellenu, vos prestará más o menos el sabor del platu. Pero la presencia a mi me paez espectacular.... Aquí vos dexo la muestra