PIZZA

La masa (usar de midía una taza de 200 cl, más o menos)

4 taces de farina de trigu, meyor de fuerza
1/3 de taza de lleche entero
1 taza d’agua
1 cucharadina de sal
1 cucharadina de miel
25 grs. de llevaúra fresco
2 cucharaes d’aceite d’oliva
2 cucharaes d’orégano.

Mezclar los líquidos nun cuencu, ye importante que tean tibios, si non, mete-ylos un segundín al microondas pa ponelos templaos. Mezclar la llevaúra, orégano y sal cola farina y echalo pa colo demás, amasando coles manes hasta que tea amestao. Tirar la masa pa la meseta y amasar unos minutinos más, procurando doblala sobre sí mesma pa que garre aire, hasta que quede como chicle pero non pegañosa. Ye una masa mui fácil de llograr, nun segundín ya ta nel puntu. Dexala 1 hora nel cuencu tapada con un plásticu, pero cuidando de facé-y dalgunos furacos. Amasala otra vuelta un poco, y separar en dos boles. De cada una, sal una pizza mediana. Na meseta enfarinada, da-yos la forma reonda coles manes o con un rodillu de cocina y dexales subir otra vuelta una media horina tapaes con un trapu. Ye útil facer esti procesu ya enriba de la placa del fornu, cubierta con un papel vexetal o d’aluminio, da menos guerra a la hora de manipulala. Lo único que nun fornu convencional, nun caben les dos pizzes al tiempu. Pa la otra puede reservase otra bandexa o molde o lo qu’haya.

Rellenu
2 cucharaes de nata llíquido
1 chorru d’aceito d’oliva
Mediu atadillu d’espinaques
1 puñáu de piñones y otru de pases
150 grs. de mozzarella rallao

Nel rellenu puede echase lo que seya. Yo usé unes cucharaes de nata llíquido qu’espurrí na base con una cuchara y unos chorros d’aceite d’oliva. Tamién se puede poner un quesu gorgonzola o azul. Enriba eché-y bien d’espinaques salteaes con piñones y pases y cubrilo too con mozzarella rallada n’abundancia. A lo último casqué un güevu en medio. Fornear 10 o 15 minutos col fornu precalentáu a 200 grados. De tener ventilador nel fornu, meyor.

Paez mui complicao, pero la única guerra que da ye respetá-y los tiempos de leváu a la masa, lo demás ye chupao y rápido.

Ya nun llegué a facé-y la foto entera, pero esti ye’l mediu resultáu. Ye una masa de pizza gorda, gorda y esponxosa. Nun ye la típica de les pizzes refrixeraes.

https://2img.net/r/ihimizer/img130/7876/mediapizza.jpg